MES DA SUSTENTABILIDADE

Desde o vindeiro 21 de marzo ata o 15 de abril de 2011, Enxeñería Sen Fronteiras levará a cabo en A Coruña unha exposición itinerante no campus de Elviña, o “Mes da sustentabilidade”. Ten como obxectivo informar sobre os residuos xerados polo ser humano, non tanto no proceso de tratamento dos mesmos, senón en canto a acadar unha reducción que permita non malgastar as fontes, recursos e materias primas do planeta. Dito evento conta coa participación e apoio de asociacións como Amigos da Terra, Verdegaia e Adega, e de empresas entre as que se atopan Sogama e Espina y Delfín.

A exposición contará con paneis informativos sobre as “Tres R” (Reducir, Reutilizar e Reciclar) e cunha exposición cedida por Amigos da Terra sobre residuos.

Por outra banda, e centrándose máis no tema da enxeñería, explícase o funcionamento das estacións depuradoras de augas residuais (EDAR). ESF pretende dar unha visión diferente sobre o tema da auga, que xa tratou con anterioridade, centrándose máis na importancia da contaminación e recuperación da mesma.

Contarase tamén cunha parte adicada á enerxía, con información sobre o seu consumo, produción e aforro, cedida por Verdegaia.

Finalmente, os primeiros días de exposición en cada Facultade realizaranse dúas dinámicas co fin de dar a coñecer o axeitado reparto da auga no uso diario e a correcta reciclaxe dos residuos urbanos.

De xeito paralelo, levaranse a cabo as actividades “Pecha a billa” e “Apaga o candil”, consistentes na pegada de carteis en interruptores e baños para concienciar do gasto e uso que se dá dos mesmos na Escola de Camiños.


As datas de realización do “Mes da Sustentabilidade” son:

Do 21 ó 25 de marzo na Escola de Camiños.
Do 28 de marzo ó 1 de abril na Facultade de Informática.
Do 4 ó 8 de abril na Facultade de Socioloxía.
Do 11 ó 15 de abril na Facultade de Educación Social.